• PICT0025 2
  • PICT0120 2
  • IMG 6575 2
  • PICT0117 2
  • IMG 0074 2
  • IMG 0072 2
  • IMG 4637 2
  • PICT0115 2
  • IMG 4701 2
  • IMG 2240 2
  • IMG 6530 2

Dr Aafang - D Grindigsmitgliider verzelle
(uss em Jubileeums - Junteross vom Herbst 1994)

Uff en Inserat in dr Zyttig hämmer is bi de «Costümfraze» gmäldet zem leere pfyffe, das isch grad noo dr Fasnacht 1968 gsi. D «Costümfraze» sin e raini Frauegrubbe gsi: D Majorene und zueglyych Obfrau het is behandlet wie Schuelmaitli; mängs het is nit basst und mr hänn dorum dert nur zwaimool mitgmacht, nämlig s erscht und s letscht Mool!
Bim e Glas Wyy im Lällekeenig hämmer derno beroote, wies soll wyter goo. Mr sin zem Schluss koo, ass mir kennte sälber ebbis uff d Bai stelle.
Im Mai 1969 hämmer derno im Schlissel die erschti Sitzig aagsetzt. S Rita het Gugelhepf mitbrocht und bim e Glas Wysse het die Idee langsam Gstalt aagnoo. S Cecile het dr Lucien gfroggt, ob är nit kennt unsere Dambourmajor syy. Dr Lucien und dr Guschti Hohl, wo au derbyy gsi isch, hänn is mänge guete Root kenne gää. Mr hänn au iber unsere zuekinftige Namme ghirnt. Dr Lucien het gwisst, ass es e Stiggli git, wo «Junteressli» haisst, und dä Namme het alle gfalle. S Signet vom Rössli in Biel-Bängge het is als grafischi Vorlaag dient; mr hänn e Zindholzbriefli abgstaubt und das e bitz abgänderet!
D Pfyfferstunde hämmer nit welle im ene prosaische Schuelzimmer abhalte. Mr hänn derno e haimeligi Baiz gsuecht und in dr Glaibaslerstube an dr Speerstroos Underschlupf gfunde. Dert hämmer im Glettizimmer derfe n iebe! Dr Instruggter isch niemer anders gsi als dr Franz Freuler, em Käthy sy Maa; Äs isch allerdings erscht im Lauf vom Joor zuen is koo, zämme mit em Lisbeth.
Im erschte Joor, also 1970, simmer mit zwölf Vorträler, dryzää Pfyffer und aim Dambuur gstartet! Und was fir e Dambuur: Dr Peter Schär! Mr hänn alli unseri Märsch beschtens kenne und es het wirgglig guet deent. S Comite isch dozmool no uff em Märt gstande, und grad wo mir an däne Heere verbyy defiliert sin, hetts em Peter mit eme lute Gnall s Fäll verjaggt! Vo däm Momänt aa hetts halt numme no pfiffe!
S erscht Sujee «S Katze-Minze-Wunder» oder «Kasch mit Wasser!» oder aifacher: «S Drachebrinneli im Allschwiler- wald.» Dr Guschti Hohl het is Wunderlärvli gmacht, wo sogar hitte no läbe! Jubi 2Dr Major isch e prächtige Luschtmolch gsi, d Pfyffer hänn e ganz gwoggt Goschdym ghaa mit goldige Bääse und durchsichtige Libällefligel, und unsere n ainzige Dambuur isch e wunderscheene Wolf im Schoofspelz gsi. Im Vortrab hämmer verschideni Figuure ghaa, zem Byspiil e Wasserniggse, e Gwellegaischt, e Wässerliabideegger, e Waldgaischt und so wyyter.
Unseri erschti Ladärne isch nit ebbe in dr Kasärne oder in dr Muba entstande. Nai, nai, iir verrotets nie! Das Prachtsstigg het d Brigitte Ritter in Paris gmoolt! Dr Deelifondroot zwische däre Wältstadt und unserem haimelige Basel isch haiss gloffe. S Zeuners hänn zue sällere Zyt au grad in Paris gwoont; si sin amme d Moolere go bsueche und hänn is denn brichtet. Zämmegrollt isch derno die Lampe kurz vor dr Fasnacht in Basel yydroffe und denn hämmer si zerscht no miesse uffs Gstell naagle.
Zem d Gselligkait au underem Joor z pflääge, hämmer bschlosse, jedes Joor e Piggnigg mit Kind und Keegel duurezfiere. S erscht Mool also am 28. Juni 1970. Mr hänn is uff dr Ponyranch in Seewe bsammlet und hänn derfe uff dr Matte, wo zum Huus vom Lucien sym Babbe gheert het, gmietlig unseri Glepfer breetle und noochhär hämmer als gschuttet! Sälbetsmool sin Beerigge dr absolut Hit gsi, und au s Wally het sich sone Ding iber dr Kopf gstilpt. Aber bimene hitzige Gfächt hets denn die Beerigge verlore, zer grosse Fraid vo alle Aawäsende! Dr Matte hämmer gly am Aafang dr Namme «Junteressliwiise» gää!
En andere Hammer im Cliggejoor isch unser Santiglaus - Ässe gsi. S erscht Joor isch bsunders stimmigsvoll uusgfalle: S het ganz fyyn gschneielet, womer is in dr Basler Kanne in dr Staine (die Wirtschaft gits nimme!), zemene Fondue droffe hänn. Dr Santiglaus isch denn nadyyrlig au scho koo. S isch e gmietlige, feyne Obe gsi.
Au dr Pfyfferbummel hämmer vo Aafang aa duregfiert, und zwor immer im Juni, wenn d Kirsi ryff sin!! In de erschte baar Joor isch en uralt, haimelig Laiterwäägeli unser Requisit gsi, dert drin hämmer unser Zvieri verstaut. Aimool hämmer Jubi 1welle in dr Langen Erle iber d Wiise, aber wyt und brait isch kai Brugg gsi. Kurz entschlosse hämmer unseri Schue abzooge, s Laiterwäägeli paggt und sin iber spitzigi Stai dur s Wasser gloffe. Meer als nur ai Mool wärs fascht lätz uuse koo und mir hänn unser Zvieri scho gsee dervoo schwimme. Vor lache hämmer fascht in d Hose gmacht!
Ändi März 1971 isch d Glaibaslerstube zue gsi und mir hänn dur dr Franz Gaschträcht in dr Cliggestube vo dr VKB im erschte Stogg im Hinderhuus vom Alte Warteck bikoo. S Parterre vo däm Hysli het als Velokäller dient, isch dräggig und voller Spinnbubbele gsi. Das isch unseri Cliggestube worde! No vyyl Froonarbet an mänggem Samschtig dur dr ganz Summer dure, hämmer am 15. Oggtober 1971 unseri Cliggestube yygweit. Uus eme gruusige, dräggige Loch isch e Bijou entstande. Em Bössli isch vor Begaischterig grad d Pfyffe in letschte Farbkessel gfalle, und si isch jetz no wyss.
Mit de Finanze ischs am Aafang nit zem Beschte gstande. Zem däre Mysere e bitzi abzhälfe, hämmer im Oggtober 1971 im Saal vom Alte Warteck e «Käferfescht» organisiert. Mr hänn e Muusig engagiert, dr Franz het mit e baar Kolleege fir e Dringg-Gäld zem Danz uffgspilt; au e Tombola hämmer uffzoge. Wie alti Profi simmer abwäggsligswyys hinder dr Bar gstande und hänn uffbasst, ass mr nit iber e Strich yyschängge. Unseri Kasse hämmer uff die Art und Wys mit ebbe 1'600 Frangge kenne uffstogge. - S Johr druff hämmer dä Aaloss noonemool duuregfiert, aber s hett nimm esoo vyyl brocht. Dr finanziell Ertraag isch in kaim Verhältnis me zem Uffwand gstande, und drum hämmer das Kapitel denn abgschlosse.

d'Grindigsmitgliider